Afgooye (Halqaran.com) – Warar ka imaanaya degmada Afgooye ee gobolka Shabeellaha hoose ayaa sheegaya in barqadii Isniinta maanta ah uu gudaha degmadaasi ka dhacay qarax miino, kaasi oo geystay khasaaro kala duwan.
Dad goobjoogayaal ah ayaa warbaahinta u sheegay in qaraxa lala beegsaday Guddoomiye kuxigeenkii hore Amniga Degmada Afgooye Xuseen Jibriil, xilli uu galayay gurigiisa oo kuyaalla wadada u dhaxeeysa Suuqa Jaadka & Saldhiga degmada Afgooye.
Warar ay helyso Halqaran News ayaa sheegaya in qaraxa uu ku dhaawacmeen Guddoomiye ku-xigeenkii hore Amniga Degmada Afgooye Xuseen Jibriil iyo Wiil Dhalinyaro ah oo la socday, kuwaas oo dhaawacooda la geeyay Isbitaalka degmada Afgooye.
Ciidamo katirsan kuwa dowladda Soomaaliya ayaa tagay halka uu qaraxa ka dhacay, kuwaas oo sameeyay baaritaanno la xiriira inay soo qabtaan dadkii ka dambeeyay qaraxaas wallow aysan ku guuleysan.
Si kastaba, qaraxani ayaa ku soo beegmaya, xilli xalay Xubno katirsan Ururka Al-Shabaab ay weerareen Saldhig Ciidamada dowladda ku leeyihiin degmadaasi Afgooye ee Gobolkaasi Shabeellaha Hoose.
Xafiiska Wararka Halqaran.com
Halqarannews@gmail.com
