London (Halqaran.com) – Dowlad Ingiriiska ayaa aad u yareysay gargaarka ay siiso Yemen oo colaad lix sano ka socotay ay ragaadisay, waxa uuna arintaas ku sababeeyey in safmarka Corona uu keenay “duruufo adag oo maaliyadeed oo dunida wada saameesey”.
Xaaladda Yemen ka jirto ayaa lagu tilmaamay in ay tahay dhibaatada bini’aadannimo ee ugu xun adduunka, waxaana la sheegay in dad tiradooda lagu qiyaasay 20 milyan oo qof oo ah saddex meelood laba bulshada Yemen ay ku tiirsan yihiin gargaarka bini’aadannimo.
Colaadaha ka socda Yemen waxaa u dheeri ah in uu burburay nidaamkii caafimaadka, waxa ayna keentay in dalku waxba ka qaban kari waayo safmarka caabuqa Corona. Yareynta gargaarka Ingiriisku siiyo Yemen, waxaa isniintii lagaga dhawaaqay shir ay yeesheen deeq-bixiyeyaasha.
Colaada Yemen waxa ay bilaabatay dabayaaqadii 2014-tii, waagaas oo fallaago gacanta ku dhigtay inta badan galbeedka dalka, waxaana xulufo sacuudigu hoggaaminayo guluf ku qaaday si dalka loogu soo celiyo xukunka Madaxweyne Cabdirabuu Mansuur Haadi.
Dowladda Mareykanka ayaa madasha ka ballan qaaday in uu bixin doono 191 milyan oo doolar oo dheeraad ah, taas oo ka dhigaysa wadarta dhaqaalaha uu sannadkan ugu deeqay Yemen 350 milyan oo doolar.
Sayid Omar Hajji – Halqaran.com
Halqarannews@gmail.com
