Muqdsiho (Halqaran.com) – Hoggaamiyaha xisbiga Wadajir Cabdiraxmaan Cabdishakuur Warsame ayaa dowladda ku eedeeyay in ay ku xirtay magaalada Beledweyne ku dhawaad 30 ruux, kuwaasoo kasoo horjeeday maamulka Hirshabeelle.
Cabdiraxmaan Cabdishakuur ayaa sheegay in dadkaasi shacabka ah loo adeegsaday in ay gacanta ku soo dhigaan ciidanka dowladda Soomaaliya iyo kuwa Itoobiya.
Hoggaamiyaha Xisbiga Wadajir, ayaa ugu baaqay dowladda Soomaaliya iyo maamulka Hirshabeelle in ay xorriyadooda u soo celiyeen dadkaasi shacabka ah.
“Waxaan xog ku haynaa in magaalada Beledweyne lagu xiray 30 ruux oo dhaqdhaqaaqayaal bulsho ah. Waxaan ugu baaqayaa madaxda dawlada Federaalka in ay dadkaas dib loogu soo celiyaan xorriyadooda.”
“Waa xaq dastuuri ah in cabashada lagu muujiyo dibadbax nabad ah, waxaa danbi ah in awooda dawlada iyo tan iyo ciidanka AMISOM loo adeegsado caburrinta, cagajuglaynta iyo cadaadiska shacabka” ayuu yiri hoggaamiyaha Xisbiga Wadajir Cabdiraxmaan Cabdishakuur Warsame.
Xafiiska Wararka Halqaran.com
Halqarannews@gmail.com
