Baydhabo (Halqaran.com) – Wafdi uu hoggaaminayo Wakiilka Midowga Yurub ee Soomaaliya, Nicolas Berlanga oo maanta gaaray Magaalada Baydhabo ayaa Maamulka Koonfur Galbeed ku wareejiyay gaadiid ciidan, oo loogu talagalay Booliska Koonfur Galbeed.
Gudoomiyaha Baarlamaanka Koonfur Galbeed, Cabdulqaadir Shariif Sheekhuna Maya ayaa wafdiga Wakiilka Midowga Yurub ee Soomaaliya ku soo dhaweeyay Magaalada Baydhabo, iyadoona ay kulan amniga looga hadlayay ku yeesheen Xarunta Madaxtooyada.
Wakiilka ayaa kulanka oo ay goobjoog ka ahaayeen Wasiirka Amniga Koonfur Galbeed iyo Saraakiisha Ciidamada Booliska ka sheegay in Midowga Yurub uu dardargelin doono taageeradiisa ku aadan tababarada iyo tayaynta Ciidamada Qalabka Sida.
Kulanka ka dib ayuu Wakiilka Midowga Yurub uu gaadiidkan uu ku wareejiyay Gudoomiyaha Baarlamaanka Koonfur Galbeed, oo tallaabadaasi kaga mahadceliyay Midowga Yurub.
Guddoomiyaha Baarlamaanka Koonfur Galbeed ayaa isna gaadiidkaasi ku wareejiyay Isaaq Cali Subag, Wasiirka Amniga Koonfur Galbeed, oo goobtaasi ku sugnaa.
Xafiiska Wararka Halqaran.com
Halqarannews@gmail.com
