Jowhar (Halqaran.com) – Iyadoo wasiir ka tirsan maamulka Hirshabelle ahna Xildhibaan ka mid ah Baarlamaanka maamulkaasi laga helay Cudurka Coronavirus ayaa mas‘uuliyiinta maamulka Hirshabelle waxa ay baadi-goob ugu jiraan dadkii uu la kulmay Xildhibaankaasi.
Madaxweynaha Maamulka Hirshabelle, Mudane Maxamed Cabdi Waare ayaa sheegay in maamulkiisa uu raadinayo dadkii uu la macaamilay Wasiirkaasi, si loo karantiilo.
Mr. Waare ayaa xusay, in muhiim ay tahay in la helo dadkii uu xiriirka la sameeyay Khaliif Muumin labadii Isbuuc ee lasoo dhaafay, si loo geliyo xaalad karantiil ah, maadama Cudurka uu yahay mid faafa oo halis ah.
“Waxaan u duceyneynaa in si deg deg ah uga soo kabto xildhibaan Hirshabelle iyo wasiiru dowlihii cadaaladda, Khaliif Muumin Tooxow, oo ah kiiska koowaad ee la xaqiijiyey ee cudurka COVID-19 oo laga helay Hirshabeelle, Waxaan hadda raadineynaa dhammaan kuwa laga yaabo inay la xiriireen isaga muddo 2 asbuuc ee la soo dhaafay, si go’doomin loo geliyo, looguna kuur galo xaaladooda”, ayuu yiri madaxweyne Waare.
DF Soomaaliya ayaa shaacisay in gudaha dalka Soomaaliya laga helay 22 ruux oo qaba Cudurka Coronavirus, kuwaasi oo ay ku jiraan Saraakiil ka tirsan Wasaaradda Caafimaadka Xukuumadda Soomaaliya.
Ugu dambeyn, waxaa cabsi badan ka jirtaa guud ahaa Soomaaliya, iyadoona walaaca ugu daran uu yahay in cudurka Coronavirus si dhaqsi ah ugu faafo bulshada dhexdeeda.
Xafiiska Wararka Halqaran.com
Halqarannews@gmail.com
