muqdisho(Halqaran.com) –Ra’iisul Wasaaraha Xukuumadda Federaalka Soomaaliya ee xilgaarsiinta Maxamed Xuseen Rooble ayaa xilka qaadis ku sameeyay Wasiirkii Wasaaradda Arrimaha Dibadda Xukuumadda Maxamed Cabdirisaaq Maxamuud.
Wareegto kasoo baxday Xafiiska Ra’iisul Wasaare Rooble ayaa waxaa xilka Wasiirka Arrimaha Dibadda iyo Iskaashiga Caalamiga Xukuumadda loogu magacaabay inuu noqdo Cabdisaciid Muuse Cali, isagoo bedelaya Wasiir Maxamed Cabdirisaaq,Halka Wasiir-ku xigeenka Wasaaradda Arrimaha dibadda loo magacaabay mudane Maxamuud Cabdi Xasan (Pekos).
Ra’iisul Wasaaraha ayaa sidoo kale isku baddelay labada wasiir ee kala ah:
Maxamed Aadan Macallin (Soomaali) oo loo magacaabay Wasiirka Xannaanada Xoolaha Dhirta iyo Daaqa iyo sido kale Xuseen Maxamed Sheekh Xuseen (Badni) oo loo magacaabay Wasiirka Howlaha Guud Guriyeynta iyo Dib-u-dhiska.
ugu dambeyntii,tallaabadan xilka qaadista iyo magacaabista uu sameeyey Rooble ayaa aheyd mid ku timid si lama filaan ah, isla-markaana kusoo aaday, xilli xasaasi ah oo lagu jiro doorashooyin.
Xafiiska Wararka Halqaran.com
Halqarannews@gmail.com
