Washington (Halqaran.com) – Ciidamada ammaanka Mareykan oo kaashanaya laanta socdaalka dalkaas ayaa billaabay olole ballaaran oo lagu soo qab-qabanayo dadka sida sharci darrada ah ku jooga dalkaas.
Ololahan oo ka socda dhammaan gobollada dalka Mareykanka ayaa la qorsheeyay in lagu soo qabqabto 2,000 oo qof oo sharci darro ah kaddib la masaafuriyo.
Dadkan la soo raafayo ayaa ah dad soogalooti ah, isla markaana ay maxkamadihii gacanta ku hayay kiisaskooda codsiga magangalyo doonka ay ku qanci waayeen cabashadooda sida uu sheegay ku simaha madax hay’adda socdaalka iyo ilaalada xudduudaha Mareykanka Matt Albence.
Albence, ma uusan bixin wax faahfaahin ah oo ku aaddan meesha ay ka bilaabeen dadkaa la soo qabqabanayo iyo sidoo kale tirada dadka ay soo qabteen ilaa hadda.
Waxa waayihii dambe kor u sii kacasay cabsida ay qabaan dadka soogalootiga ah ee ku nool magaalooyinka waaweyn ee Mareykanka, kuwaasi oo ay askartu xoog ku galeyso albaabadooda xaafadaha ay ku noolyihiin.
Dalka Mareykanka waxaa ku nool Soomaali badan oo la sheego qaarkood in ay dalkaas ku joogaan si sharci darro ah.
Mareykanka ayaa dhowr jeer oo hore gegida diyaaradaha Aadan Cadde ka Soo dejiyey muwaadiniin Soomaaliyeed oo dalkaa laga soo masaafuriyey.
Xafiiska Halqaran.com, Nairobi
Halqarannews@gmail.com
