Muqdisho (Halqaran.com) – Waxaa duhurnimadii Axadda maanta Xeebta Degmada Xamarweyne laga helay meydka Wiil dhalinyaro ah, oo dadka deegaanka ay sheegeen inay soo tuftay badda.
Dadka deegaanka ayaa sheegay ninkan dhalinyarada ah oo jirkiisa aysan ka muuqan dhaawacyo, balse isaga oo meyd ah mar keliya lagu arkay xeebtaasi, halkaasi oo dadkii badda u Kalluumeysi tagay ay soo arkeen.
Intaasi kadib ayaa dadka deegaanka ku ah nawaaxiga Xeebta Xamarweyne gaar ahaan agagaarka Aba Aweyska, waxa ay ku wargeliyeen Saldhiga Booliska Degmada Xamarweyne in xeebta uu yaalo meydka wiil dhalinyaro ah.
Ciidamada Booliska Saldhiga Degmada Xamarweyne oo gaaray goobtaasi ayaa waxa ay meesha ka soo qaadeen meydka wiilkaasi, waxaana illaa hadda la garan la’yahay ehelkiisa.
Sawirka meydka wiilkaasi ayaa lagu faafiyay baraha bulshada, si haddii ehelkiisa ay aqoonsadaan ay uga soo raadiyaan Saldhiga Degmada Xamarweyne.
Xafiiska Wararka Halqaran.com
Halqarannews@gmail.com
