Muqdisho (Halqaran.com) – Guddoomiyaha Golaha Shacabka, Baarlamaanka 11-aad ee JF ee Soomaaliya Sheekh Aadan Maxamed Nuur (Aadan Madoobe) ayaa kulan gaar ah isugu yeeray dhammaan Taliyeyaasha iyo Saraakiisha ugu sareysa Ciidamada Qalabka sida.
Kulankan ayaa inta uu socday looga hadlay xaaladda amniga doorashada dalka gaar ahaan tan Madaxweynaha Jamhuuriyadda Federaalka.
Guddoomiyaha Golaha Shacabka ee BFS Sheekh Aadan Madoobe ayaa Saraakiisha uga digay inay ku milmin Arrimaha siyaasadda, amniga doorashadana ay kaga amar qaataan Gudoomiyaha Golaha Shacaka inta lagu jiro marxaladda kala guurka illaa uu dalka ka yeelanayo Madaxweyne.
Waxaa ka soo qeybgalay kulanka taliyeyaasha Ciidamada Booliska Jeneraal Cabdi Maxamed Xijaar, Taliyaha Booliska Gobolka Farxaan Qaroole, Taliyihii Hay’adda NISA Xildhibaan Yaasiin Farreey iyo Saraakiil kale oo ka tirsan Ciidanka Milateriga dowladda.
Waxaa lagu wadaa in maalmaha soo socda Magaalada Muqdisho ay ka dhacdo doorashada Madaxweynaha JF Soomaaliya.
Waa kulankii ugu horreeyay ee uu Guddoomiyaha golaha shacabka ee BF Soomaaliya Sheekh Aadan Madoobe uu la qaato Taliyeyaasha.
Xafiiska Wararka Halqaran.com
Halqarannews@gmail.com
