Muqdisho (Halqaran.com) – Warar ay haleyso mareegta Halqaran.com, ayaa sheegaya, in Isbitaalka Digfeer ee magaalada Muqdisho la xiray, kaddib markii looga cabsooday faafitaanka cudurka Coronavirus (COVID-19).
Dhaqaatiir ka tirsan Isbitaalka Digfeer ayaa lagu soo warramayaa in laga helay Covid-19 sababta ugu wayn ee Isbitaalka loo xirayna ay tahay arrintaasi, kadib markii maamulka Isbitaalka ay go‘aamiyeen arrintaan, sida saraakiil ka tirsan Isbitaalka ay xaqiijiyeen.
Wararka ayaa intaasi ku daraya, in saraakiisha kaliye ay u furan tahay qeybta gurmadka deg-deg ah ee loogu tala-galay dadka dhaawacyada ah iyo haweenka foosha ah.
Sidoo kale, wararka ayaa sheegaya, in xaalad deg-deg ah lagu soo rogay isbitaalka, islamarkaana la karantiilay dhaqaatiir, shaqaale iyo howlwadeeno ka tirsan isbitaalka Digfeer, kuwaas oo la sheegay in looga shakiyey cudurka halista badan ee Coronavirus.
Arrintaan ayaa ka dambeysay, kadib markii Jimicihii shalay wasaaradda caafimaadka Soomaaliya ay shaacisay illaa 9 xaaladood oo Fayraska Corona ah oo saddex ka mid ah dadka laga helay ay ka howlgalayeen Isbitaalka Digfeer.
Ugu dambeyn, cabsida laga qabo faafida Cudurka Coronavirus (COVID-19) ee Soomaaliya ayaa sii kordheysa marba marka ka dambeysa, waxayna dowladda federaalka ah ay wadaa dadaallo lagu xakameynayo cudurkaasi.
Xafiiska Wararka Halqaran.com
Halqarannews@gmail.com
