Muqdisho (Halqaran.com) – Warar goor-dhow ay heshay mareegta Halqaran.com, ayaa sheegaya, in garoonka diyaaradaha ee Aadan Cadde ee Muqdisho lagu xiray guddoomiyaha degmada Garbahaarey ee gobolka Gedo, Iimaan Cadow Kaarshe, sida sarkaal ka tirsan DF Soomaaliya inoo xaqiijiyay.
Gudddoomiye Iimaan Cadow Kaarshe ayaa waxaa laga reebay diyaarad u socotay magaalada Garbahaarey oo uu garoonka ka raaci lahaa, waxaana u yimid ciidamada amniga oo siiyey warqad ay u ku qoran yihiin amaro sheegayo in laga doonayo saldhig ku yaalla garoonka.
Wararka ayaa sheegaya in Iimaan Cadow hadda lagu hayo laguna wareysanayo saldhigaas. mana cadda waxa lagu haysto ee duulimaadka loogu reebay.
Iimaan Cadow Kaarshe ayaa ka mid ah xubnaha aadka ugu dhow madaxweynaha Jubaland Axmed Madoobe oo dowladda ay dagaal siyaasadeed xooggan kula jirto.
Arrintan ayaa waxa ay qeyb ka tahay, dagaalka siyaasadeed ee u dhaxeeya muddooyinkii dambe dowladda Soomaaliya iyo maamulka Jubbaland.
Xafiiska Halqaran.com, Muqdisho
Halqarannews@gmail.com
