Muqdisho (Halqaran.com) – Wasiirka Wasaaradda Waxbarashada Xukuumadda Federalka Soomaaliya, Cabdulaahi Goodax Barre, ayaa sheegay in aan wali la xalin Khilaafkii ka dhex taaagnaa Puntland iyo Wasaaradda Waxbarashada Xukuumadda Soomaliya.
Wasiir Goodax Barre, ayaa sheegay haddii ardayda Puntland aysan galin Imtixaanka Shahaadiga ee ay agaasinto Wasaaradda Waxbarashada Soomaaliya, ardayda Puntland aysan heli doonin Shahaado.
Mr. Goodax Barre ayaa sheegay Puntland inay doonayaan imtixaanka inay iyaga agaasintaan, kadibna ay helaan Shahaadada dowladda dhexe ee Somaliya.
“Puntland aragtidooda waxa waaye Imtixaanka annagaa qaadeyno, Wasaaradda Waxbarashada oo Imtixaanka agaasinto ma rabno in aan wax la wadaagno in macluumaadka ardayga u sheegno, anaga agaasimeena, kaliya Wasaaradda waxbarashada shahaadada ha siiyaan, anagana waxaa niri arrintaas macquul ma ahan, inay ayaga is maamulaan anagana aan shahaado bixino oo aysan shaqeysan cadaalad ma ahan.”Ayuu yiri Wasiir Goodax oo la hadlaayay laanta Af Soomaaliga ee BBC-da.
Wasiirka Wasaaradda Waxbarashada Xukuumadda Federalka Soomaaliya, Cabdulaahi Goodax Barre ayaa sidoo kale yiri:, “Puntland waa in ay imtixaanka galaan ama aysan shahaado soo raadsan oo ay isku filnaadaan.‘‘
Si kastaba, waxaa weli jira Khilaaf u dhaxeeya dowladda Federalka Soomaaliya iyo Maamulka Puntland, Khilaafkaasi oo salka ku haayo arrimaha ku aadan Siyaasadda iyo dhanka waxbarashada.
Xafiiska Wararka Halqaran.com
Halqarannews@gmail.com
