Muqdisho (Halqaran.com) – Taliyihii xabsiga dhexe ee Xamar Jeneraal Maxamed Sheekh Cumar Xirsiile, ayaa xilkii laga qaaday, kadib markii horay shaqo joojin loogu sameeyay.
Warar soo baxay ayaa sheegaya in Taliyaha Ciidamada Asluubta Soomaaliya Mahad Cabdi raxmaan Aadan uu shaqada ku soo celiyay Jeneraal Xirsiile, balse amar ka soo baxay madaxda sare ee dowladda xilka looga qaaday.
Taliyaha cusub ee xabsiga dhexe, ayaa waxaa loo magacaabay Gaashaanle Sare Aadan Xuseen Kulmiye inuu noqdo Taliyaha Cusub ee Xabsiga Dhexe ee Xamar, isagoo beddelaya Jeneraal Maxamed Sheekh Cumar Xirsiile.
Jeneraal Xirsiile ayaa lagu eedeeyay inuu Isbitaal kala soo baxay Bukaan Maxbuus ahaa oo xaaladdiisa ay liidatay, kaasi oo ugu dambeyn ku geeriyooday Isbitaalka martiini.
Kiiskaasi, ayaa wuxuu noqday mid si wayn u saameeyay Taliyihii Xabsiga dhexe, waana sababta keentay xil ka qaadista in lagu sameeyo.
Ehelada ninkii bukaanka ahaa ee geeriyooday, ayaa dalbaday in cadaaladda la waafajiyo Taliyaha Xabsiga dhexe ee ka dambeeyay in Bukaankaasi uu geeriyoodo, maadaama isaga oo ku xiran yahay Oxygen uu ka soo furay Taliyaha uuna soo kaxeystay.
Xafiiska Wararka Halqaran.com
Halqarannews@gmail.com
