Kismaayo (Halqaran.com) – Wararka naga soo gaaraya gobolka Jubbada hoose ayaa sheegaya, in dagaal khasaaro kala duwan geystay uu ka dhacay deegaanka Baar Sanguuni, wuxuuna dhexmaray Ciidamo ka tirsan kuwa Dowladda Soomaaliya gaar ahaan kuwa Mareykanka uu tabaray ee loo yaqaano Bangaraafta iyo Xubno ka tirsan ururka Al-Shabaab.
Dagaalka ayaa yimid, kadib markii Ciidamada dowladda oo dhaq dhaqaaqyo Ciidan ka waday deegaanka Baar Sanguuni oo qiyaastii 40 km u jira Magaalada Kismayao ay weerar ku qaadeen Xubno ka tirsan Al-Shabaab, waxaana la sheegay in uu halkaasi ka dhacay dagaal socdey in ka badan Saacad.
Dadka deegaanka Baar Sanguuni qaarkood oo diidey in Magacooda iyo Codkooda loo adeegsado Warabahinta ayaa waxaa ay sheegeen inay maqlayeen dhawaqa rasaasta ay isku adeegsanayeen labada dhinac, hayeeshee aysan cadeyn karin khasaaraha ka dhashay.
Sarkaal ka tirsan Ciidamada dowladda ee ka howlgalla Gobolka Jubbada Hoose ayaa Warbaahinta u sheegay inay iska difaaceen weerar kaga yimid dhinaca maleeshiyada Al-Shabaab, isla markaana ay khasaaro ku gaarsiiyeen.
Geesta kale, Ururka Al-Shabaab ayaa baraha Internet-ka taageera ku qorey in dagaalka ka dhacay deegaanka Baar Sanguuni ay ku dileen 10 askari oo ka tirsan ciidamada Dowladda, walow aysan jirin warar madax banaan oo xaqiijinaya.
Xafiiska Wararka Halqaran.com
Halqarannews@gmail.com
