Baydhabo (Halqaran.com) – Wararka naga soo gaaraya magaalada Baydhabo ee xarunta gobolka Baay ayaa sheegaya, in meydka haweeney laga soo saaray Suuliga Xaafad ku tirsan magaalada Baydhabo.
Haweeneydan oo lagu magacaabo AUN Aamio Maxamuud Malaaq ayaa la waysanaa maalmihii la soo dhaafay, iyadoo shalay galab meydkeeda laga helay Boosaneer, kaddib markii la dilay, halkaasina lagu riday, sida ay booliska Koonfur Galbeed ay sheegeen.
Ciidamada Nabad sugidda Koonfur Galbeed ayaa ku guuleystay in meydka Allaha u naxariistee Aamina ay ka soo saaraan boosaneerta, kaddib markii uu ku riday ninkii dilay marxuumadda.
Warar ay helayso HalQaran News ayaa sheegaya, in ninka dilay haweeneydaas ay ku laheyd deyn, isagoona ugu yeeray gurigiisa oo uu u ballan-qaaday inuu ku wareejinayo gurigaasi, maadaama uusan bixin karin deyntii ay ku laheyd.
Balse, markii ay ugu timid gurigiisa ayuu dilay, kadibna wuxuu ku riday Suuliga, sidaas ayaana muddo maalmo ah lagu waysanaa meydka Marxuum Aamina, sida ay warbaahinta u xaqiijiyeen ehelladeeda.
Baaritaan dheer kadib, waxaa la sheegay in ninkii watay Bajaajta qaaday Aamina ee geysay guriga lagu dilay uu sheegay halkii ugu war dambeysay, waxaana lagu guuleystay in laga gun-gaaro kiiskaan oo la helo meydka, lana soo qabto ninkii dilka geystay.
Dhacdadan ayaa noqotay mid aad looga argagaxay magaalada Baydhabo, waxaana socda baaritaanno ay kiiskaan ku hayaan ciidamada Nabad Sugidda maamulka Koonfur Galbeed oo kaalin weyn ka geystay raadinta Meydka Allaha u naxariistee Aamina Maxamuud Malaaq.
Xafiiska Wararka Halqaran.com
Halqarannews@gmail.com
